الیکشن کمیشن نے کے پی بلدیاتی انتخابات کے نتائج ویب سائٹ پر جاری کردیے

اسلام آباد: الیکشن کمیشن نے خیبرپختونخوا میں بلدیاتی انتخابات کے پہلے مرحلے کے نتائج اپنی ویب سائٹ پر جاری کر دیے۔

الیکشن کمیشن کی ویب سائٹ پر جاری نتائج کے مطابق بلدیاتی انتخابات میں پشاور سٹی کونسل کی 130 نشستوں میں سے 123 کے نتائج سامنے آئے ہیں، ان میں سے اکثریت پر آزاد امیدوار جب کہ دوسرے نمبر پر عوامی نیشنل پارٹی اور تیسرے نمبر پر جے یو آئی ایف امیدوار کامیاب ہوئے ہیں۔

نتائج کے مطابق انتخابات کے پہلے مرحلے میں سب سے زیادہ یعنی 39 آزاد امیدوار کامیاب ہوئے جب کہ عوامی نیشنل پارٹی 32 کامیاب امیدواروں کے ساتھ دوسرے نمبر پر ہے۔

جے یو آئی ایف کی 13 کامیاب امیدواروں کے ساتھ تیسری پوزیشن جب کہ پاکستان پیپلز پارٹی اور تحریک انصاف 11،11 نشستوں کے ساتھ چوتھے اور پانچویں نمبر پر رہیں۔

نتائج کے مطابق جماعت اسلامی کے 4 امیدوار اور مسلم لیگ (ن) کے 3 امیدوار کامیاب رہے، انتخابات میں پاکستان راہ حق پارٹی کا ایک امیدوار کامیاب ہو سکا۔

ولیج کونسل میں 6 آزاد اور جے یو آئی کے 3 امیدوار کامیاب ہوئے جب کہ ولیج کونسل میں پی ٹی آئی کا ایک بھی امیدوار کامیاب نہ ہو سکا۔

اپنا تبصرہ بھیجیں