ٹارگٹ کلنگ :کراچی میں فائرنگ سے کار سوار جاں بحق، ایک زخمی

کراچی : شہر قائد میں ٹارگٹ کلنگ کے واقعات میں روز بروز اضافہ ہوتا جا رہا ہے، قائدآباد میں بھی نامعلوم مسلح افراد نے گولی مار کر ایک شخص کو ہلاک اور دوسرے کو زخمی کردیا۔

پولیس کے مطابق کے مطابق کراچی کے علاقے قائد آباد مرغی خانے کے قریب گاڑی پر فائرنگ کا واقعہ پیش آیا ہے جس میں گاڑی پر فائرنگ سے ایک شخص جاں بحق دوسرا زخمی ہوگیا۔

اس حوالے سے ریسکیو ذرائع کا کہنا ہے کہ جاں بحق شخص کی شناخت خدا دوست کے نام سے ہوئی ہے، ہلاک شخص کی لاش اور زخمی کو اسپتال منتقل کردیا گیا۔

رکن قومی اسمبلی آغا رفیع اللہ نے پولیس کو بتایا کہ جاں بحق ہونے والا شخص میرے پارٹی ورکر کا چھوٹا بھائی تھا جس کا قائدآباد تھانے کی حدود میں قبرستان کی زمین پرتنازع چل رہا تھا۔

ایم این اے آغا رفیع اللہ نے بتایا کہ ہمیں دھمکیاں مل رہی تھی، زخمی ہونے والا دوسرا شخص قبرستان کا چوکیدار ہے جس کو طبی امداد کیلئے اسپتال بھیجا گیا ہے۔

قائدآباد فائرنگ واقعے کے عینی شاہد زخمی عمر زادہ نے میڈیا سے گفتگو کرتے ہوئے بتایا کہ ہم عدالت سے گھر واپس جارہے تھے، قائدآباد پل پر چڑھے تو ایک گاڑی نے بریک لگا کر سائیڈ دبائی۔

عمر زادہ نے مزید بتایا کہ دو موٹرسائیکلوں پر سوار نامعلوم ملزمان نے گاڑی پر فائرنگ کردی، ملزمان فائرنگ کے بعد قائد آباد کی طرف فرار ہوگئے۔

اپنا تبصرہ بھیجیں